الشروط والأحكام

لما تطلب من موقع فكرة FKERA (إحنا) أنت موافق على الشروط دي. كتبناها ببساطة عشان تبقى واضحة للطرفين.

1. الطلب

إرسال الطلب من الموقع مش بيلزمك بحاجة لسه. الطلب بيتأكد لما حد من فريق المبيعات يكلمك وتتفقوا على التفاصيل والشحن.
من حقنا نعتذر عن أي طلب، وخصوصًا لو المحتوى مسيء أو مخالف للقانون أو فيه تعدي على حقوق حد تاني. ولو كنت دفعت عربون وقتها، بيرجعلك كامل.

2. الأسعار

الأسعار بالجنيه المصري. اليفط بتتحسب بالمتر المربع حسب الخامة، والقطع الصغيرة ليها حد أدنى.
السعر اللي بيتثبت هو السعر وقت ما بعت الطلب، حتى لو السعر اتغير بعدها.
الشحن والتركيب مش داخلين في سعر المنتج. البياع بيقولك تكلفتهم قبل التأكيد.
العروض ليها مدة وشروط مكتوبة عليها، ومش بتتجمع مع بعض إلا لو ده مكتوب.

3. المحتوى واللوجو

أنت مسؤول إن اللوجو والكلام والصور اللي بتبعتها من حقك تستخدمها.
التصميم اللي بنعمله لطلبك بيبقى ليك تستخدمه، ومن حقنا نعرض صورة الشغل المنفّذ في «من شغلنا» بس لو وافقت على ده.

4. التصميم والموافقة

بنبعتلك التصميم على صفحة طلبك قبل التنفيذ، وتقدر تطلب تعديل.
لما توافق على التصميم، بننفّذه زي ما هو بالظبط. فراجع الكلام والأرقام والألوان كويس قبل الموافقة.

5. العربون والدفع والإلغاء

بتدفع عربون 40٪ بعد موافقتك على التصميم، والباقي عند الاستلام. قواعد الإلغاء ورجوع العربون وعيوب الصناعة مكتوبة في العربون والاسترجاع، وهي جزء من الشروط دي.

6. التنفيذ

ممكن يبقى فيه فرق بسيط في درجة اللون بين الشاشة والخامة، وفرق مليمترات في المقاس بسبب طبيعة القص والتشطيب.
مواعيد التسليم تقريبية وبتبدأ من بعد الموافقة على التصميم ودفع العربون. التأخير اللي من شركة الشحن أو لظروف برا إيدنا مش بيدّيك حق تلغي بعد ما التنفيذ بدأ، بس هنبلّغك أول بأول.

7. الصفحات الذكية (NFC)

الصفحة الأساسية مجانية دايمًا طول ما الخدمة شغالة. والمميزات الزيادة باشتراك اختياري ليه مدة وسعر مكتوبين.
أنت مسؤول عن اللي بتكتبه على صفحتك. ومن حقنا نوقف أي صفحة فيها محتوى مخالف للقانون أو بتُستخدم في نصب.

8. القانون

الشروط دي بتخضع لقوانين جمهورية مصر العربية، وأي خلاف بنحاول نحلّه بالتفاهم الأول.

9. التعديلات

ممكن نحدّث الشروط دي، والنسخة اللي تمشي على طلبك هي النسخة اللي كانت موجودة وقت ما بعته. شوف كمان سياسة الخصوصية.