سياسة الخصوصية

الصفحة دي بتشرح البيانات اللي بناخدها منك لما تستخدم موقع فكرة FKERA، وبنعمل بيها إيه. مش بنبيع بياناتك لحد.

البيانات اللي أنت بتدينا ياها

وأنت بتطلب: الاسم، والموبايل، والإيميل لو كتبته، والمحافظة والعنوان، ومجال شغلك، وأي ملاحظات.
الملفات: اللوجو والصور وشيتات الأسماء اللي بترفعها عشان نصمم وننفذ.
للشركات: اسم الشركة وتفاصيل الطلب في طلب عرض السعر.
الصفحات الذكية (NFC): اللي بتكتبه على صفحتك (زي رقمك وحساباتك) بيبقى ظاهر لأي حد يفتح الصفحة. ده الغرض منها، فاكتب اللي أنت عايز الناس تشوفه بس.

لو بدأت تكتب بياناتك في فورم الطلب وما كملتش، بنحتفظ بالاسم والموبايل والمنتج اللي كنت بتختاره عشان نقدر نكلمك ونساعدك تكمّل.

البيانات اللي بتتجمع لوحدها

نوع الجهاز والمتصفح، وعنوان IP، والصفحات اللي فتحتها.
جيت منين: الإعلان أو الرابط اللي دخلت منه.
عدد مرات فتح الصفحات الذكية (من غير ما نعرف مين فتحها).
اسمك ورقمك بيتحفظوا على جهازك أنت (مش عندنا) عشان ما تكتبهمش تاني في الطلب الجاي.

بنستخدمها في إيه

ننفذ طلبك: نكلمك، ونصمم، ونصنّع، ونشحن.
نبعتلك تحديثات عن طلبك على واتساب أو برسالة.
نعرف أي إعلان جاب طلبات عشان نصرف على الإعلانات صح.
نحمي الموقع من الطلبات الوهمية والإساءة.

الإعلانات وملفات تعريف الارتباط (Cookies)

بنستخدم أدوات قياس من منصات الإعلانات: Meta (فيسبوك وإنستجرام)، وTikTok، وSnapchat، وGoogle (الإعلانات وAnalytics)، وLinkedIn. الأدوات دي بتسجل أحداث زي «شاف منتج» و«بعت طلب» و«التصميم اتوافق عليه»، عشان نعرف الإعلانات بتجيب نتيجة ولا لأ.

لما تبعت طلب، ممكن نبعت للمنصات دي الموبايل والإيميل بعد تشفيرهم (Hashing)، فالمنصة تقدر تطابقهم مع حسابها من غير ما تشوف رقمك نفسه. تقدر توقف الإعلانات المخصصة من إعدادات الإعلانات في كل منصة، أو تمسح الـ Cookies من المتصفح.

مين بيشوف بياناتك

فريق فكرة اللي شغال على طلبك بس (المبيعات والتصميم والتنفيذ والشحن).
شركة الشحن: الاسم والموبايل والعنوان عشان توصّل الطلب.
منصات الإعلانات: زي ما هو مكتوب فوق.
أي جهة رسمية لو القانون ألزمنا.

صور شغلك

مش بننشر صورة شغلك في «من شغلنا» غير لو وافقت على ده وأنت بتطلب، ومن غير اسمك.

صفحة طلبك

رابط صفحة طلبك فيه كود خاص بيك، وأي حد معاه الرابط يقدر يشوف الطلب. فما تبعتوش لحد مش عايزه يشوفه.

بنحتفظ بيها قد إيه

طول ما هي لازمة لطلبك وخدمة ما بعد البيع، وبعد كده للمدة اللي الحسابات والقانون محتاجينها.

حقك

تقدر تطلب نسخة من بياناتك، أو تصحيحها، أو مسحها (إلا اللي لازم نحتفظ بيه قانونيًا زي الفواتير). ابعتلنا على واتساب أو على info@fkera.com من نفس الرقم أو الإيميل اللي طلبت بيه.

التعديلات

لو غيّرنا السياسة دي هنحدّث الصفحة هنا. استخدامك للموقع بعد التحديث معناه إنك موافق على النسخة الجديدة.